قالك: كوجنو
قلت: يا عيني..قلت ياسيدي ده جالي منين
قالك: ورده وشجرة وخشبة..
وحبة فول مقسومة اتنين
قلت: ده نظري
وهدعي لربي يعني عليه
قالك: باودر ..قلب لخبط هات كفارين
وكتاب عملي عليه العين
أبيض فاضي ييجي بعشرين
قالك: رسمك مش بالإيد
اطلع برة ملكش جريد
من غير بالطو كمان يا عبيط
وفي السكشن شغال تنطيط
ماينس خمسة أهو يا حويط
.......
قالك: شفوي
قلت: وماله مزاكر نظري.. مزاكر عملي
قالك:ورقة
قالك:واسطة
قلت: دي سَلَطة !!
قالك: روح هاتلك طبقين
قلت: منين ؟؟
قال: خليك مرزوع ساعتين
قلت: هاخدها دراع وأزُق
قالك: حاول ..فنجري بُق
..............
يوم جه دوري
دخلت بطولي
وتلاتة غيري معايا داخلين
وساعة إيدي يجيلها اتنين
قالت : انت .. سميلي دي
قعدت أهز وأشم وأدوق
وألف بعيني لتحت وفوق
عاوز أجيبها أحاول أفوق
قلتلها: يمكن برقوق !!
وتلاتة غيري راحم داحكين
والباقي طبعا عارفين
شايل المادة يجيلي سنتين
ونص الدفعة معايا شايلين
وقالك كوجنو
وقلت يا عين
:)
ليست هناك تعليقات:
إرسال تعليق